O líder da oposición no Reino Unido, o laborista Jeremy Corbyn, declarou este luns que o seu partido "proporá ou apoiará" unha emenda en favor dun novo referendo sobre a saída británica da Unión Europea.
O Partido Laborista avanzou que presentará unha cláusula para ser sometida a votación o vindeiro mércores no Parlamento na que pedirá aos deputados que apoien unha unión aduaneira "permanente" coa UE, segundo un comunicado.
Se ese plan alternativo fracasa, os laboristas "cumprirán coa promesa" de apoiar un novo referendo, detallou o portavoz para o Brexit da formación, Keir Starmer.
Antes de que Corbyn defenda de forma oficial un plebiscito, intentará que a Cámara dos Comúns acepte negociar un novo acordo con Bruxelas que permita ao Reino Unido manter unha "aliñación próxima" co mercado único, así como participar en axencias e programas europeos.
O líder laborista confirmou tamén que na votación desta semana apoiará unha emenda presentada pola súa compañeira de partido Yvette Cooper e o conservador Oliver Letwin que obrigaría ao Goberno a aprazar o Brexit se non se aproba un acordo antes do 13 de marzo.
"A primeira ministra (a conservadora Theresa May) está a deixar correr temerariamente o reloxo, nun intento por forzar aos parlamentarios a elixir entre o seu acordo errado e un desastroso 'non acordo'", sostivo Corbyn.
"Dunha forma ou outra, faremos todo o que estea no noso poder para previr un 'non acordo' e opornos ao perigoso Brexit dos tories (conservadores)", agregou o laborista.
No congreso anual do partido, celebrado o pasado setembro, Corbyn comprometeuse a promover unha nova consulta no caso de que non lograse forzar unhas eleccións xerais anticipadas, pero rexeitara ata agora apoialo de xeito explícito.
A súa xestión do Brexit, xunto coa súa suposta permisividad con actitudes antisemitas, levaron a nove deputados laboristas a deixar o partido nos últimos días.
