O ex secretario xeral do PP valenciano Ricardo Costa denunciou este mércores ante o xuíz do caso Bárcenas que está a recibir ameazas anónimas desde que desvelou o pago de comisións de empresarios para financiar o partido a instancias do expresidente Francisco Camps e pediu que se lle poña protección.
O xuíz do caso Bárcenas, José de la Mata, citara este mércores a Costa como testemuña na súa investigación sobre a caixa b do PP e ao comezar a súa comparecencia, que se prolongou case dúas horas, denunciou ser obxecto de ameazas telefónicas e, aínda que dixo descoñecer a súa procedencia, sospeita que poidan vir da contorna empresarial, segundo informaron fontes xurídicas presentes na declaración.
Ademais de relatalo ante o xuíz presentou un escrito, do que non se deu traslado ás partes, detallando esas ameazas anónimas, que "non cesan" e fronte ás que ten "unha alta preocupación", precisaron as fontes.
Unha vez finalizado o interrogatorio, no que se ratificou en todo o que dixo no xuízo á rama valenciana de Gürtel no que apuntou a Camps como responsable do financiamento irregular, Costa quedou media hora máis co xuíz da Audiencia Nacional para detallarlle as ameazas e valorar se require protección. Ademais das ameazas, explicou, como xa fixo no xuízo, que era unha práctica habitual no PP valenciano recibir diñeiro de empresarios da Comunidade Valenciana, do que se encargaba directamente o entón vicepresidente valenciano Víctor Campos, ao que viu en numerosas ocasións con sobres de diñeiro.
Ese diñeiro remitíao despois a xestora do partido en Valencia á sede de Xénova para ingresalo en cantidades non superiores a 3.000 euros e así eludir as previsións da Lei de financiamento de partidos políticos.
El directamente, dixo, só recibiu unha entrega de 150.000 euros en billetes de 500 en 2008 do empresario José Mayor Oreja (FCC) para financiar actos da campaña das eleccións xerais, segundo sinalou aos xornalistas Enrique Santiago, avogado de IU, que exerce a acusación nesta causa. Para facer esta entrega, Mayor Oreja comunicoulle que estaba en Valencia vendo a formula 1 e acudiu persoalmente á sede do partido e entregoulle o diñeiro.
Ese diñeiro que entregaban os empresarios era a cambio de contratos na Comunidade Valenciana aínda que non estableceu unha relación directa entre os pagos e os contratos adxudicados, pero todos eles eran empresarios con contratos nesa comunidade. De feito chegou a mencionar que máis de 600 millóns en contratos foron adxudicados a empresarios que realizaran achegas.
Segundo este avogado, Costa detallou tamén a organigrama da formación valenciana e indicou que el, como secretario xeral, ademais de ocuparse da área política, asumía a xestión e administración do partido e que por encima estaban os presidentes do partido, que teñen esas mesmas competencias.
A estrutura nacional, precisou, reproducíase de forma idéntica, tratándose dun partido xerarquizado e destacou que os xerentes e tesoureiros territoriais eran directamente designados pola xerencia e tesourería nacional e era a eles aos que lle daban contas.
Ratificou tamén que só acudiu unha vez a Xénova a entrevistarse co extesoureiro do PP Luis Bárcenas para comunicarlle as prácticas irregulares que se estaban levando a cabo para o financiamento do partido e manifestar que el se negaba a participar nese sistema.
Tal e como relatou no xuízo, sostivo que Bárcenas entendeu que non lle parecese ben esa forma de financiarse, pero, ao ser preguntado se se lle pediu acabar con ese sistema, recoñeceu que non recibiu ningunha indicación, segundo sinalou o letrado de IU.
Este mércores tamén estaba prevista a comparecencia como testemuña e a petición propia do exalcalde de Boadilla del Monte (Madrid) Arturo González Panero, O Albondiguilla, procesado polos seus negocios coa trama Gürtel e para o que a Fiscalía pide 40 anos e 9 meses de cárcere. Con todo, o seu interrogatorio aprazouse ao venres ao alegar o exalcalde motivos de saúde.
