A Policía Nacional detivo a oito persoas en seis provincias españolas, Madrid, Tenerife, Tarragona, Cidade Real, Valencia e Badaxoz, e investiga a unha novena, menor de idade, por acosar sexualmente a menores por internet.
🚩 DETENIDOS ocho pedófilos en diferentes provincias de España por acosar sexualmente a una niña de 13 años a través de Internet. Gracias a la denuncia de una madre en el correo 📧 [email protected] se pudo iniciar la investigación. #SomosTuPolicía pic.twitter.com/R4jhuGRcd5
— Policía Nacional (@policia) 9 de noviembre de 2019
PESCUDAS. A investigación arrincou en abril de 2017 tras a denuncia dunha nai no correo [email protected], na que alertaba do contacto da súa filla, unha menor de 13 anos, cunha persoa que dicía ter unha axencia de modelos.
Este individuo, un home de 24 anos residente na Comunidade de Madrid e con numerosos antecedentes, insería anuncios falsos dunha coñecida marca de lencería en busca de mozas, segundo un comunicado da Policía.
A investigación revelou que o sospeitoso estivera acosando a unha segunda menor de 12 anos na provincia de Alacante e foi detido. No rexistro do seu domicilio os axentes identificaron a outras oito menores, de entre 12 e 16 anos, que responderan ao seu falso anuncio en distintas provincias españolas.
Un dos detidos chegou a concertar un encontro cunha menor e a manter relacións sexuais con ela
RESTO DE DETIDOS. En paralelo, a Policía descubriu que a menor que orixinou a investigación fora acosada a través das redes sociais por outros individuos diferentes logo de subir varias fotos do seu rostro e corpo en posturas suxestivas.
En total foron identificadas nove persoas que solicitaran e obtido material sexual desa menor. Un deles chegou a concertar un encontro con ela e a manter relacións sexuais.
A Policía asegura que a investigación revelou as diferentes estratexias que usaban os acosadores para conseguir os seus obxectivos.
Un dos detidos, de 33 anos e residente en Tenerife, fíxose pasar por unha muller para gañarse a confianza da menor, díxolle que tiña unha enfermidade terminal e que o seu último desexo era que coñecese ao seu suposto mellor amigo.
En Tarragona foi detido outro home de 26 anos que enviara ás menor fotografías dos seus xenitais e cuxa estratexia se baseou en banalizar "as relacións sexuais entre persoas de distintas idades". No rexistro do seu domicilio descubriron que acosara a outra menor de 14 de anos.
Outro home de 29 anos detido en Cidade Real tratou de dar "pena" á vítima logo de asumir un rol de confidente e conselleiro. Tamén neste caso, durante o rexistro, identificouse a unha segunda vítima.
Do resto dos detidos, tres residían na provincia de Valencia e un en Badaxoz.
Na última fase da investigación os axentes constataron que o primeiro arrestado, de Madrid, volvera a inserir anuncios en redes sociais co mesmo modus operandi.
Aínda que tras a primeira detención os seus proxenitores retiráronlle o material informático ao seu alcance, este logrou conectarse a través dunha consola de videoxogos. Cando foi detido, admitiu que non podía deter a súa conduta compulsiva.
