A difusión e toma de imaxes dos axentes só se sancionará se supón un risco para a seguridade dos propios funcionarios ou das súas familias, segundo acordaron os grupos parlamentarios no relatorio que estuda a reforma da Lei de Seguridade Cidadá, coñecida como lei mordaza.
En acordo que está en consonancia coa instrución que recentemente distribuíu a Secretaría de Estado de Seguridade no mesmo sentido e que foi moi criticada polos sindicatos policiais e as asociacións de gardas civís.
De todos os xeitos, será a Comisión de Interior a que terá que votar as diferentes propostas, nun primeiro trámite parlamentario ao que seguirán a discusión no Pleno e o seu paso polo Senado.
Na reunión deste mércores, segundo indicaron a Efe fontes parlamentarias, abordáronse diversas cuestións relacionadas coas infraccións previstas na Lei, algunhas das cales se verán modificadas ou eliminadas.
Sería o caso do uso indebido de uniformes e outros símbolos oficiais ou as súas réplicas, que non se considerará infracción grave, así como a plantación de drogas, como marihuana, en lugares como os balcóns da propia vivenda.
Tal e como pedían algúns grupos, houbo acordo para que se intente despenalizar a convocatoria espontánea de manifestacións, de tal xeito que se poida pedir a autorización correspondente catro horas antes e a través de internet.