Os duques de Sussex mudaranse do palacio de Kensington á Frogmore House, unha casa de campo adxacente ao Castelo de Windsor, a principios de 2019. A parella trasladarase para preparar o nacemento do seu primeiro fillo, previsto para a próxima primavera, explicou o palacio de Kensington.
O seu novo fogar é o lugar onde o príncipe Enrique e Meghan celebraron a segunda recepción da súa voda para familiares e amigos íntimos.
O fillo menor do príncipe Carlos e a exactriz estadounidense contraeron matrimonio no castelo de Windsor (nos arredores de Londres), o pasado 19 de maio e o 15 de outubro anunciaban o embarazo de Meghan.
Segundo a citada fonte, Windsor "é un lugar moi especial" para o matrimonio, que desde o seu compromiso en 2017 reside en Nottingham Cottage, unha casa nos terreos do londiniense palacio de Kensington, onde tamén viven os duques de Cambridge cos seus tres fillos, os príncipes Jorge e Luis e a princesa Carlota.
