Prohibir o aceite de palma non conseguiría deter a perda de biodiversidade, xa que o seu cultivo sería substituído por outros que tamén ameazarían a sustentabilidade ambiental, segundo un informe divulgado este martes pola Unión Internacional para a Conservación da Natureza (UICN).
O informe, titulado Aceite de palma y biodiversidad, afirma que outros cultivos aceiteros necesitan ata nove veces máis terra que o de palma.
A UICN sostén que substituílo por outros podería incrementar significativamente o total de terras empregadas para producir todo o aceite vexetal necesario para a crecente demanda mundial.
O organismo explica que entre 1980 e 2014 a produción mundial do aceite de palma multiplicouse por quince, de 4,5 millóns de toneladas ata case 70 millóns de toneladas, debido sobre todo ao seu baixo custo de produción.
A UICN alerta, con todo, de que este tipo de produto segue afectando á biodiversidade mundial, incluíndo 193 especies consideradas como ameazadas (segundo a Lista Vermella desta organización), e entre as especies que máis dano sufriron estarían orangutáns, xibóns e tigres.
En Indonesia e Malaisia concéntrase o 85 % da subministración global deste aceite
Actualmente, calcula o informe, no mundo existen uns 18,7 millóns de hectáreas deste cultivo e a súa demanda espérase que creza un 1,7 % por ano ata 2050. En Indonesia e Malaisia concéntrase o 85 % da subministración global deste aceite, seguidos por Colombia e Nixeria.
O groso desta produción é exportado principalmente a países da Unión Europea, China, India, Estados Unidos, Xapón e Paquistán.
"A metade da poboación mundial utiliza aceite de palma na súa comida.(...) O aceite de palma está aquí para quedar, así que necesitamos urxentemente accións coordinadas para facer máis sostible a súa produción", aseverou no informe Inger Andersen, directora xeral da UICN.
