Etiopía fixo este xoves historia ao nomear á diplomática Sahlework Zewde presidenta do país, converténdose na primeira muller en ocupar a xefatura de Estado etíope e a única actualmente nese cargo en toda África.
"Necesitamos construír unha sociedade que rexeite a opresión cara ás mulleres", afirmou Sahlework, tras ser elixida por unanimidade nunha sesión conxunta das dúas cámaras do Parlamento.
"Se alguén pensa que falo moito sobre mulleres, que espere a escoitar todo o que teño que dicir", subliñou a flamante presidenta.
A designación de Sahlework, ata agora representante especial do secretario xeral da Onu, António Guterres, ante a Unión Africana (UA), produciuse tras a dimisión do seu predecesor, Mulatu Teshome, que ocupaba desde 2013 un cargo que en Etiopía ten un alto valor representativo pero non poderes executivos.
A elección ocorreu unha semana despois de que o primeiro ministro de Etiopía, Abiy Ahmed, aprobase unha histórica reforma do seu gabinete na que reducía o número de carteiras e establecía que a metade estivesen ocupadas por mulleres. Desde a semana pasada, dez dos vinte membros do novo Goberno de Etiopía son mulleres, incluída por primeira vez a ministra de Defensa, unha carteira que tradicionalmente ocupaban só homes.
"é un movemento histórico a elección da embaixadora Shalework Zewde como nova presidenta de Etiopía. Trae consigo as competencias e a experiencia correcta", sinalou o xefe da Oficina do Primeiro Ministro, Fitsum Arega, na súa conta de Twitter.
Sahlework: "Se alguén pensa que falo moito sobre mulleres, que espere a escoitar todo o que teño que dicir"
Fitsum remarcou tamén que, nunha "sociedade patriarcal" como a etíope, "a elección dunha muller na xefatura do Estado non só establece un estándar para o futuro, senón que tamén normaliza o establecemento das mulleres como as encargadas de tomar decisións na vida pública".
Cunha ampla carreira diplomática, Sahlework foi directora xeneral da Onu nas súas oficinas en Nairobi ata que asumiu o papel de representante especial do secretario xeral das Nacións Unidas ante a UA.
Esta designación resulta acorde cunha serie de reformas democráticas adoptadas por Abiy, pero tamén busca, segundo algúns observadores, tranquilizar a onda de violencia étnica que azoutou nas últimas semanas a este país do Corno de África. Mentres que Mulatu, o primeiro ministro e o ministro de Asuntos Exteriores etíope, Workneh Gebeyehu, pertencen á etnia Oromo, Sahlework é Amhara, polo que isto garantiría unha composición étnica máis harmónica entre os altos cargos da política etíope.
A presidenta de Etiopía é a primeira do continente despois de que a xefa de Estado de Mauricio Ameenah Gurib-Fakim dimitise o pasado marzo tras un escándalo de corrupción financeira.
