O antropólogo social do Consello Superior de Investigacións Científicas (CSIC) Francisco Ferrándiz considera "ultrasinxela" a exhumación do ditador Francisco Franco e poderíase executar en menos dunha hora, sen necesidade da presenza dun forense ao ter o certificado de defunción.
En declaracións a Efe, Ferrándiz recordou o seu labor como membro da Comisión de Expertos sobre el Valle de los Caídos no ano 2011 na que se propuxo sacar tanto a Franco como ao fundador de Falanxe, José Antonio Primo de Rivera, do Valle de los Caídos. "O obxectivo era o desmantelamento da xerarquía funeraria franquista", explicou.
O científico, que traballou co experto Francisco Etxeberria, destacou que as tarefas para sacar a Franco son "ultrasinxelas" xa que non fai falta nin que haxa un forense ao contar co certificado de defunción.
TRÁMITES. Ferrándiz subliñou que o Goberno de Pedro Sánchez está "blindando" xuridicamente a decisión para que "sexa irreversible". "é un decreto con moita autoridade vai ser asinado polo Rei e desfaise un funeral de Estado", explicou.
"Teñen que ser ultracuidadosos para que non se poida impugnar e sería un erro sacar o corpo antes do trámite parlamentario", opinou.
Ao fío disto, avanzou que un notario será o encargado de levantar o acto e un servizo de funeraria trasladaría o corpo, contratado pola familia ou polo Estado.
"É unha situación que se produce cada día nun cemiterio de España", engadiu.
ACTUACIÓN. "Tecnicamente é moi sinxela nunha hora estaría sacado o sarcófago", apostilou á vez que subliñou que a primeira medida sería levantar a lápida que pesa 1.500 quilos pero coas maquinarias actuais desenvolveríase con facilidade.
Ferrándiz sinalou que esta exhumación é un "paso fundamental" para a resignificación do monumento xa que o corpo do ditador ten "moito simbolismo". "Se acode ao Valle comprobas que non hai ningún tipo de explicación da zona", advertiu.
Ao fío disto, o antropólogo apostou polo uso das novas tecnoloxías para facer un relato "pedagóxico".
Tamén manifestou que o asunto máis complicado do monumento é "resolver" as criptas que ten máis de 33.000 corpos.
"é posible resignificar o monumento con vontade política e tempo", propuxo.
O científico subliñou a importancia de que se constrúa unha "cidadanía crítica".
