Tres persoas resultaron feridas, unha delas moi grave, ao arder un piso no distrito de Sants-Montjuïc de Barcelona, o que obrigou a desaloxar uns 40 veciños. Segundo informou o Concello da cidade condal, o incendio desatouse pouco antes das 6.00 horas deste mércores no piso 1-2 do número 6 da rúa Súria e, a través dun patio interior, propagouse ao edificio lindeiro, o 2-4.
O lume causou queimaduras a dúas das persoas que vivían no piso no que se orixinaron as lapas, unha das cales resultou ferida moi grave, mentres que un terceiro veciño sufriu unha crise de ansiedade.
Sete dotacións dos Bombeiros de Barcelona, así como efectivos da Garda Urbana e do Sistema de Urxencias Médicas (SEM) acudiron ao lugar do incendio, que xa foi extinguido.
Os veciños do edifico no que se iniciou o lume non puideron regresar aínda ás súas casas xa que quedaron sen servizos, mentres que os ocupantes do bloque ao que se propagaron as lapas volveron xa aos seus pisos.
