A portavoz do Goberno, Isabel Celáa, asegurou este venres que as "ameazas" da familia Franco non impedirán que se realice a exhumación dos restos do ditador do Val dos Caídos, porque xa se tardou "bastante" e a postura expresada polos familiares "non cambia nada".
Na rolda de prensa tras o Consello de Ministros, Celáa referiuse deste xeito ao escrito remitido pola familia de Francisco Franco na que advirte ao Executivo de que podería incorrer nun delito de prevaricación e usurpación de funcións, ademais doutro de profanación "de sepultura".
INICIO DO PROCESO. O Goberno aprobou este venres a incoación do expediente administrativo, que se contempla no decreto lei para a exhumación dos restos de Franco, polo que se dá 15 días á familia para presentar alegacións e comunicar o destino para enterrar os restos.
No caso de que non comunique este lugar, será o Goberno o que decida onde se fará a nova inhumación.
"As ameazas non van cambiar nada a determinación do Goberno", afirmou Celáa sobre a exhumación dos restos de Franco, porque "non pode haber ningún mausoleo nun sistema democrático para un ditador" e engadiu: "Xa tardamos bastante. Imos a iso, non cambia nada".
Segundo manifestou Celáa, o Goberno está "a rexenerar a democracia en todas as frontes" e, dentro deste obxectivo, "arranxar o pasado tamén axuda a un proxecto de futuro feliz e xusto para todo o mundo".
Respecto da conversión do Val dos Caídos nun cemiterio civil, precisou que esa é a intención do Goberno, o que "pode ser contrastado" co resto de forzas parlamentarias, xa que o decreto, unha vez validado no Parlamento, "vai ser tramitado como proxecto de lei" e poderanse interpor emendas.
A notificación enviarase a todos os interesados, e a ministra supuxo que, entre eles, tamén estará a comunidade benedictina da basílica.
A partir desa notificación, ábrese o período de 15 días para as alegacións á exhumación e desde o Goberno mantense que para finais de ano, "para Nadal", pode estar terminado o procedemento.
Preguntáronlle por unha vixilia, prevista para as 20.00 horas deste venres na chaira do Val, na que, previsiblemente, ondearán bandeiras anticonstitucionais, e Celaá sinalou que, se hai incumprimento da lei, as forzas de seguridade do Estado intervirán.
