O Goberno prohibirá a inhumación dos restos de Francisco Franco na catedral da Almudena de Madrid alegando motivos de seguridade, segundo informa o diario El País na súa edición dixital.
Segundo o diario, un informe da delegación do Goberno de Madrid servirá para rexeitar a pretensión da familia de enterrar na cripta da catedral da Almudena a Franco.
O informe do Goberno de Madrid, refire El País, "conclúe que os restos non deberían baixo ningún concepto enterrarse na cripta da catedral da Almudena por motivos de orde pública, de risco de ameazas terroristas, de colapso da zona en datas sinaladas ou de enfrontamento entre partidarios e detractores dentro da cripta, onde a policía non pode entrar por ser un lugar sacro".
O Executivo apelaría ao ben superior da "defensa dos dereitos dos demais cidadáns que circulan pola zona", afirma o diario, que engade que o expediente está listo para as alegacións finais da familia e a decisión do Consello de Ministros.
