Un home matou este luns catro nenos de entre 1 e 11 anos cos que levaba preto de 24 horas atrincheirado nun apartamento de Orlando (Florida, EE UU. e despois suicidouse, segundo informaron este martes as autoridades.
"Entramos no apartamento e atopamos que os catro nenos foron asasinados e o sospeitoso con aparentes disparos", explicou de madrugada en rolda de prensa o xefe da Policía de Orlando, John Mina.
"Non temos nin idea -engadiu- de cando morreron os nenos", que tiñan 1, 6, 10 e 11 anos.
Todo empezou a noite do domingo, cando a noiva do sospeitoso, identificado como Gary Wayne Lindsey Jr., de 35 anos e con antecedentes por incendios e outros delitos, chamou á Policía por un altercado doméstico.
A muller fuxira do apartamento deixando atrás aos catro nenos, dous dela e os outros dous de Lindsey.
Cando os policías chegaron preto da medianoite ao complexo de apartamentos para facerse cargo da situación, o sospeitoso abriu fogo e feriu de gravidade a un dos axentes, Kevin Valencia, dando inicio a un atrincheramento que se prolongaría ata a noite do luns.
Mina explicou que a Policía estivo en contacto "directo e indirecto" con Lindsey ao longo do día para negociar a súa entrega.
Con todo, pouco antes das 21.00 hora local do luns (03.00 GMT), un axente decatouse do corpo sen vida dun dos nenos dentro do apartamento, polo que as autoridades decidiron iniciar un operativo de rescate do resto.
Cando entraron, segundo explicou Mina, acharon mortos aos nenos e tamén a Lindsey, dun aparente suicidio.
