Todos os fillos de vítimas de violencia machista e de nais asasinadas por calquera outro tipo de violencia contra a muller terán dereito a partir deste domingo a unha pensión de orfandade de ao redor de 600 euros, fronte aos 140 establecidos ata agora.
O Boletín Oficial do Estado (BOE) publica este sábado a lei á que deu luz verde o pasado 21 de febreiro o Pleno do Congreso dos Deputados -tras pasar polo Senado- que mellora estas axudas e que ten carácter retroactivo desde 2004, ano no que se aprobou a lei integral contra a violencia de xénero.
En concreto, a norma de mellora da situación de orfandade das fillas e fillos de vítimas de violencia de xénero e outras formas de violencia contra a muller, impulsada polo PSOE e que entra en vigor este domingo, prevé unhas melloras que suporán unha prestación mínima duns 600 euros para os fillos de vítimas que non cotizasen ou non cumprisen os requisitos mínimos (500 días nos últimos 5 anos).
Para os orfos que si as perciben, auméntaselles do 52 ao 70 % o cálculo da base reguladora das nais -e ao 118 % se hai máis dun beneficiario-, co que se asegura que reciban ese mínimo de 600 euros ao mes.
Terán dereito ás pensións os fillos das vítimas que no momento da morte sexan menores de 21 anos ou estean incapacitados para o traballo, aínda que se poderán manter ata os 25 anos cando estean a estudar ou non teñan recursos.
O texto non contempla a concesión destas axudas a outros orfos absolutos -cando o menor queda sen pai e nai- por calquera outra circunstancia.
No entanto, inclúese que o Goberno realice no prazo máximo de tres meses da lei un estudo para analizar outros casos de orfandade absoluta, como en accidentes de tráfico, para que reciban prestacións de idénticas cantidades.
Esta disposición adicional paralízase "ao convocar eleccións", segundo advertiu a deputada do PP Mar Cotelo durante o debate previo á votación final do texto.
