O secretario xeral de Podemos, Pablo Iglesias, cre que é "interesante" a proposta dun compañeiro seu de partido de cultivar marihuana en España polo "seu clima privilexiado" e logo exportala "con denominación de orixe" a Canadá, onde se aprobou o seu uso recreativo.
Iglesias opinou sobre este asunto na súa conta de Twitter, despois de que un dos membros do Consello Cidadán de Podemos, o sociólogo Jorge Moruno, aludise á legalización da marihuana en Canadá.
"España ten un clima privilexiado que ben podería exportar marihuana con denominación de orixe -como o viño- a Canadá; pero nada, será unha tolemia....", escribiu Moruno, membro da área económica e modelo produtivo do Consello Cidadán.
Unha mensaxe na súa conta de Twitter ao que respondeu despois Iglesias para dicir que a proposta lle parece "interesante".
Iglesias admite que esa opinión "xerará polémica" porque "é un tema no que hai moitas posicións", pero subliña que é "absurdo" que se poida "comprar tequila ou xenebra nun supermercado e que a marihuana sexa ilegal".
A legalización para uso lúdico da marihuana en Canadá -o segundo país do mundo en adoptar esa medida logo de Uruguai- era unha promesa electoral do primeiro ministro canadense, Justin Trudeau, e chega logo de sete meses de intenso debate parlamentario.
