Os cantautores Joaquín Sabina e Joan Manuel Serrat opinaron este mércores desde Cidade de México sobre a situación política en España e en especial sobre o auxe do partido ultradereitista Vox, algo que lle parece "alarmante" ao andaluz. "O de Vox é alarmante porque España era un dos poucos países de Europa que non tiña unha ultradereita claramente definida", dixo o xienense nunha rolda de prensa no Auditorio Nacional de Cidade de México para presentar a súa xira con Serrat.
O cantante de Úbeda opinou que este partido "entrou forte" no Congreso dos Deputados "por culpa do presidente socialista (Pedro Sánchez) que non fixo o que tiña que facer antes cos pactos anteriores", en referencia ás erradas negociacións con Podemos que derivaron nas eleccións do 10 de novembro. "É un momento moi delicado", engadiu.
Pola súa banda, Serrat matizou que "a aparición de Vox é resultado de que se desenmascarou a dereita que xa existía", e tamén criticou que se repetisen as eleccións. "Como diría (Antonio) Machado, 'todo pasa e todo queda, pero o noso é pasar'. Pero non pasou nada, esperamos novas eleccións para ter o mesmo resultado", opinou Serrat.
Sabina
"Esta onda de reguetón latino, de trap ou de hip hop ao principio ilusionoume, pero agora preferiría que non rimaran porque vaia merda de rimas se ouven por aí"
CRÍTICAS AO REGUETÓN. Ambos se mostraron abertos a escoitar música de todos os xéneros, aínda que valoraron negativamente o auxe da música urbana. "Teño que dicir que esta onda de reguetón latino, de trap ou de hip hop ao principio ilusionoume porque cantan e riman, pero agora preferiría que non rimaran porque vaia merda de rimas se ouven por aí", espetou Sabina.
Máis conciliador, o seu compañeiro de xira dixo estar un pouco decepcionado, pero asumiu que "ás veces o que máis enche o escaparate musical non é o que un preferiría".
Durante a súa estancia en Latinoamérica Sabina e Serrat foron conscientes da axitación en varios países da rexión como Colombia, Bolivia ou Chile, onde se desataron masivas protestas cidadás. "O sur está a estalar. A xente quéixase unha vez máis de que os gobernantes non os escoitan", manifestou Sabina.
Serrat
"Compartimos escenario en certo momento e obtivemos unha moi boa resposta. Ademais a nosa relación persoal foi en aumento"
NAMORADOS DE MÉXICO. Sabina e Serrat están en México con motivo da súa xira No hay dos sin tres, que dará sete concertos no país latinoamericano, dous deles no Auditorio Nacional de Cidade de México o 29 e o 30 de novembro. "Estamos namorados de todos os Méxicos", dixo Sabina na rolda de prensa xunto a Serrat, quen recordou que sentiu "querido, respectado e integrado" cando se exiliou en México en 1975 por criticar o réxime franquista.
Desde 2007, co álbum Dos pájaros de un tiro, Serrat e Sabina emprenderon un camiño en común, ademais de continuar coas súas carreiras por separado, co que satisfixeron as ansias de moitos seguidores de ambos. "Compartimos escenario en certo momento e obtivemos unha moi boa resposta. Ademais a nosa relación persoal tamén foi en aumento", comentou Serrat á vez que chanceaba co seu amigo e compañeiro.
