O presidente da Comisión Europea (CE), Jean-Claude Juncker, subliña a necesidade de facer "máis e con maior rapidez" para facer fronte á situación migratoria, pero advirte de que os recursos do Fondo Fiduciario da Unión Europea (UE) para o norte de África "son, desgraciadamente, limitados". Nunha carta remitida ao xefe do Executivo español, Pedro Sánchez, Juncker di compartir a "sensación de urxencia" pola situación que se xerou en España por mor das chegadas de inmigrantes polo Mediterráneo.
A Comisión, a Alta Representante da UE para a Política Exterior e a presidencia semestral do Consello, que corresponde a Austria, enviaron o pasado 25 de xullo unha carta aos Estados membros para instalos a "alimentar" o fondo "con importes que se axusten ás expectativas reais", recorda Juncker na carta. "Son plenamente consciente de que as necesidades manifestadas por Marrocos esixen un esforzo financeiro moi superior. Como ben sabes, os recursos do Fondo Fiduciario da UE para o norte de África son, desgraciadamente, limitados", escribe o presidente do Executivo comunitario.
Juncker engade que o programa será obxecto dun incremento orzamentario "en canto dispoñamos dos fondos necesarios" e que seguirá sendo de calquera forma "un asunto de máxima prioridade". Nunha recente carta a Juncker, Sánchez xa pedira asistencia de urxencia adicional para facer fronte á chegada masiva de pateras ás costas españolas a través da ruta do Mediterráneo occidental.
A cifra de inmigrantes rescatados por Salvamento Marítimo nesta zona e en augas do Estreito ata finais de xullo, 22.091 persoas, supera xa o total de auxiliados en todo o ano pasado. Juncker subliña na súa carta "o pleno apoio" da CE a España para desenvolver unha resposta á presión migratoria e recalca que a UE "está disposta a aumentar a súa achega" no apoio a España e Marrocos para abordar a situación.
A CE cifra o apoio a Marrocos en máis de 100 millóns de euros nunha década, que o sitúa como o segundo país, tras Libia, que máis financiamento comunitario recibe neste ámbito entre os países veciños ao sur do bloque europeo. A misiva de Juncker, escrita en castelán, confirma tamén a recepción da solicitude de axuda de urxencia remitida pola Garda Civil e afirma que esta petición se está revisando. "A Comisión está disposta a facer todo o posible para proporcionar o apoio que se necesita, e espero con interese a oportunidade de proseguir a estreita cooperación coas autoridades españolas na aplicación dos programas do Fondo Fiduciario da UE en Marrocos", conclúe Juncker.
