O presidente da Deputación de Valencia, Jorge Rodríguez, e os outros cinco detidos no chamado caso Alquería quedaron en liberdade aínda que seguen investigados por malversación e prevaricación por irregularidades na contratación de persoal. Os seis detidos foron trasladados á Cidade da Xustiza de Valencia pouco despois das 16.00 horas e ás 18.15 horas abandonaba as dependencias xudiciais o último deles despois de acollerse todos ao seu dereito a non declarar ante o titular do Xulgado de Instrución número 9, que leva o caso.
O presidente da Deputación de Valencia, Jorge Rodríguez, declarou aos xornalistas que estaba "moi tranquilo" e que "todo saíra ben". Arroupado por familiares, Rodríguez detívose ante os medios de comunicación e ao ser preguntado pola destitución dos seus cargos orgánicos no PSPV-PSOE e a proposta de substitución á fronte da Deputación, comentou: "É a primeira noticia, así que non o vou valorar".
Rodríguez engadiu que as decisións adoptadas polo seu partido son "lóxicas nunha situación como esta. Eu estou tranquilo", agregou. Sobre a súa declaración, comentou que lle dixo ao xuíz que non podía "dicir nada porque todo está baixo segredo de sumario" e ten que saber primeiro "de que vai a causa. A acusación dunha malversación de 2 millóns de euros é unha barbaridade. é unha desproporción absoluta. Non podo dicir máis".
Entre empuxóns de cámaras e xornalistas, o tamén alcalde de Ontinyent concluíu: "Por favor, vale xa, a situación non foi fácil". A continuación marchou nun coche particular cos seus familiares. Outro dos detidos, Manuel Reguart, asesor de Rodríguez, saíu nervioso da súa declaración ante o xuíz e, entre berros, afirmou: "Isto é unha barbaridade, é unha desproporción. Estou en liberdade".
Tanto Agustina Brines, coxerente de Divalterra, como Ricard Gallego, xefe de gabinete do presidente da Deputación, non fixeron declaracións á súa saída da Cidade da Xustiza e marcharon en senllos coches particulares en compañía dos seus familiares.
O coxerente de Divalterra, Xavier Simón, o primeiro en saír, ás 17.40 horas, limitouse a afirmar que estaba en liberdade sen medidas cautelares, e o letrado de Divalterra, Jorge Cuerda, expresouse en termos similares.
