O equipo de xinecólogos do Hospital Clínic de Barcelona conseguiu que mulleres con menopausa precoz queden embarazadas, unha das cales xa tivo un bebé san, mediante unha técnica pioneira no mundo. Segundo explicou en rolda de prensa o xinecólogo do Clínic, Francesc Fàbregues, a técnica "aínda é un ensaio clínico" e experimentouse con doce mulleres que sufriron a menopausa en idades temperás, unha das cales levou a termo con éxito o embarazo.
Fàbregues detallou que a nova técnica, que publicaron na revista Journal of Ovarian Research, consiste nunha laparoscopia para extirpar unha parte do córtex ovárico, que posteriormente é fragmentado e reinsertado ao ovario da paciente. Tras esta intervención estimúlase hormonalmente á muller durante unhas semanas para obter ovocitos, que logo son fecundados in vitro.
O xinecólogo explicou que a técnica se aplicou a doce mulleres con menopausa avanzada —unha anomalía que afecta ao 1% das mulleres—, a metade das cales conseguiron ter actividade ovárica tras a intervención.
