O ex primeiro ministro francés Manuel Valls despexou este martes a incógnita e anunciou a súa intención de optar á alcaldía de Barcelona nas eleccións municipais de 2019: "Quero ser o próximo alcalde de Barcelona".
Díxoo nun acto no Centre de Cultura Contemporània de Barcelona (CCCB), ao que asistiron numerosos medios nacionais e franceses, e que non contou cos dirixentes de Ciudadanos Albert Rivera, Inés Arrimadas nin Carina Mejías, aínda que Rivera alentou a súa candidatura –si estiveron Nacho Martín Blanco (C's) e a irmá de Valls, Giovanna, entre os 60 invitados–.
Valls aposta pola creación dunha plataforma cidadá transversal, que apoia Ciudadanos, para configurar unha candidatura de progreso, "inclusiva e forte" de cara ás municipais de maio de 2019 así como un proxecto "ambicioso". Polo momento, descoñécese a súa composición e a presenza que terá o partido laranxa.
O político, nacido no barrio barcelonés de Horta –como recordou este mesmo martes nun apuntamento en Twitter–, foi primeiro ministro de Francia entre 2014 e 2016, tamén é exalcalde de Evry e exministro de Interior francés, e é aínda deputado da Asemblea Nacional francesa. Cargo do que dimitirá tras a súa aposta por converterse no rexedor de Barcelona.
CIUDADANOS. Pola súa banda, Albert Rivera celebrou que o ex primeiro ministro francés opte á Alcaldía de Barcelona:
"Ninguén mellor para recuperar o prestixio de Barcelona e derrotar ao separatismo e ao populismo nas urnas", escribiu nun tuit.
Muchas gracias, @manuelvalls, por aceptar este reto. Nadie mejor para recuperar el prestigio de Barcelona y derrotar al separatismo y al populismo en las urnas. Es una gran noticia para nuestra ciudad, para España y para toda Europa. Endavant! https://t.co/y4UiSfUrzr
— Albert Rivera (@Albert_Rivera) 25 de setembro de 2018
