A primeira ministra británica, Theresa May, superou este mércores a moción de confianza convocada polo Partido Conservador para decidir sobre a súa continuidade á fronte da formación e o Goberno.
May obtivo 200 votos a favor e 117 en contra nunha votación secreta á que estaban chamados todos os deputados do grupo tory na Cámara dos Comúns.
Tras a súa vitoria, a primeira ministra non poderá ser sometida de novo a unha moción de confianza polo seu propio partido en 12 meses, aínda que si podería afrontar unha moción de censura contra o seu Goberno por parte da oposición laborista.
A deputada conservadora Nicky Morgan afirmou tras a votación que "a razón prevaleceu", mentres que o seu compañeiro de bancada Jacob Rees-Mogg, un dos líderes da facción euroescéptica da formación, considerou que os 117 votos en contra de May supoñen un "resultado terrible" para ela.
May aprazou a votación parlamentaria que estaba prevista este martes sobre o acordo do Brexit, dado que decenas dos seus propios deputados ameazaban con rebelarse e votar contra o seu pacto. A xefa de Goberno trata agora de lograr novas concesións da Unión Europea (UE) para facilitar a aprobación do texto.
En particular, busca clarificacións que satisfagan aos euroescépticos descontentos co mecanismo de salvagarda para evitar unha fronteira en Irlanda do Norte. Esa facción dos tories, que activou a moción de confianza contra May, temen que esa cláusula deixe ao Reino Unido integrado nas estruturas comunitarias durante anos, polo que esixen á primeira ministra a certidumbre de que non será unha solución indefinida.
May afirmou este mércores, nunha intervención a porta pechada fronte aos seus deputados antes de someterse a unha moción de confianza, que non se presentará ás próximas eleccións, previstas para 2022.
