Un mozo de 18 anos residente en Florida ao que os seus pais expulsaron da casa por ser homosexual non só foi aceptado pola prestixiosa Universidade de Georgetown (EE.UU.), senón que cursará gratis os estudos, informaron este luns medios locais. Segundo Seth Owen, que vive en Jacksonville (nordés de Florida) os seus pais botárono da casa en febreiro pasado pola súa inclinación sexual e advertíronlle de que só o admitirían de regreso se asistía aos oficios dunha igrexa baptista á que eles acoden.
Ante esta situación, Owen solicitou unha axuda económica para estudar na Universidade de Georgetown, unha institución católica situada en Washington, pero en principio foille denegada. Todo cambiou cando a universidade coñeceu a situación persoal do raparigo e decidiu beneficialo co seu programa de bolsas, recolleu a canle Local 10 News.
Antes de que Georgetown saíse na súa axuda, un dos profesores de Seth Owen abriu unha conta no portal GoFundMe para axudarlle a custear os seus estudos universitarios. Ata agora recadáronse uns 140.000 dólares, cando a meta era conseguir os 20.000 requiridos para a matrícula e cubrir o primeiro ano de estudos.
A universidade dirixida por xesuítas comunicoulle ao raparigo que espera que con eses fondos cre bolsas para estudantes da comunidade LGBTQ que poidan atoparse en circunstancias similares á súa.
Na conta, o profesor de Bioloxía de secundaria e mentor de Owen destacou a valentía do mozo que, pese ao drama que vive, "mantivo a cabeza alta e continuou traballando a tempo completo ata completar os seus estudos de secundaria como o mellor" da súa clase.
