O Nadal termina con 50 mortos nas estradas, seis máis que o ano pasado

As vacacións de Nadal deixaron cincuenta falecidos nas estradas en accidente de tráfico, seis máis que nas anteriores, e deles sete non facían uso do cinto de seguridade.

Ademais, segundo datos da Dirección Xeral de Tráfico, do total de falecidos nove viaxaban a bordo de motocicletas (6) ou ciclomotores (3).

Desde as 15.00 horas do venres 21 de decembro e ata as doce da noite deste luns, festivo en nove comunidades autónomas e Ceuta e Melilla, producíronse 47 accidentes de tráfico mortais.

As estradas con máis sinistralidade foron as de Andalucía, con 13 falecidos, por diante das de Castela-A Mancha e Galicia, con cinco en cada caso.

En Asturias, A Rioxa, País Vasco e Ceuta e Melilla non se rexistrou ningunha vítima mortal. Do total de accidentes, 39 tiveron lugar en vías convencionais e 8 en autoestradas e autovías.

O accidente máis frecuente este Nadal foi a saída de vía, con 18 sinistros, seguido da colisión frontal e a traseira, con 8 cada un, mentres que dous peóns e un ciclista morreron atropelados.

Sete dos falecidos que viaxaban en turismo ou furgoneta non utilizaban o cinto de seguridade no momento do sinistro.

Tráfico cifra en 19,7 millóns os desprazamentos de longo percorrido realizados durante o período do Nadal, o que supón un incremento do 8,7% respecto das anteriores vacacións.

A DXT recorda que estes datos se refiren ás primeiras 24 horas de producirse o accidente, polo que poden sufrir algunha modificación cando os equipos de atestados realicen a correspondente investigación do suceso.