Polo menos 21 persoas morreron en Estados Unidos nos últimos días a consecuencia da onda de frío polar que afectou ás rexións setentrionais do país desde o martes e que este venres empezou a remitir tras días de bater marcas mínimas de temperatura.
O Servizo Nacional de Meteoroloxía de Estados Unidos (NWS) prevé que o desprazamento cara ao leste do aire polar provocará un rápido quecemento e que o domingo moitas das áreas que rexistraron temperaturas por baixo dos -30 graos centígrados se sitúen por encima de 0º.
As temperaturas manteranse por encima do punto de conxelación durante varios días pero o NWS advertiu de que espera que o mércores outra masa de aire polar se sitúe sobre as zonas central e occidental do norte dos Estados Unidos.
A subida das temperaturas e as previsións de choivas preocupan ás autoridades locais, que temen agora que a neve e o xeo acumulado nos últimos días se derrita rapidamente e cause inundacións. A Axencia de Protección Ambiental de Illinois e o departamento de Policía de Wilmington, nese mesmo estado, advertiron este venres da posibilidade de que o xeo bloquee o río Kankakee e provoque que se desborden as súas augas.
O departamento de Policía da localidade sinalou que debido ás temperaturas extremadamente frías formouse un bloque de xeo de once quilómetros no río Kankakee. "Coa anticipada subida das temperaturas, a fusión do xeo e choiva prevista para esta fin de semana, a cidade está preocupada porque algunhas áreas da comunidade poden quedar alagadas", engadiu o corpo policial nun comunicado.
En Michigan, FEMA, a axencia federal para a xestión de urxencias, tamén advertiu sobre a posibilidade de inundacións inesperadas nos próximos días.
O risco de inundacións fai prever que o número de mortos causados pola tormenta polar siga aumentando nos próximos días. De momento, a maioría das mortes rexistrouse na rexión central e do Medio Oeste de Estados Unidos, nos estados de Michigan, Illinois, Ohio e Minesota, onde os termómetros se situaron a niveis mínimos históricos, como os -30 graos centígrados alcanzados en Chicago o xoves.
Ademais dos mortos, o xornal The New York Times dixo este venres que a tormenta polar provocou decenas de casos de conxelación de extremidades, especialmente entre persoas sen teito.
Só un hospital de Chicago tratou a medio centenar de persoas con síntomas de conxelación e algunhas sufrirán amputacións. Un número substancial das mortes producíronse a consecuencia de accidentes de circulación debido ás malas condicións de moitas estradas, cubertas con xeo e neve.
Mentres, tras o tuit do presidente estadounidense, Donald Trump, do pasado martes no que unha vez máis cuestionaba o cambio climático, os científicos apresuráronse a explicar as razóns das condicións meteorolóxicas extremas.
A Axencia Nacional Oceánica e Atmosférica (NOAA), un dos organismos do Departamento de Comercio do Goberno de Trump, explicou que a onda de frío é consecuencia da inestabilidade do vórtice polar que existe de forma permanente sobre o Polo norte. Segundo sinalou NOAA, o vórtice é unha área de baixas presións e aire frío que rota en dirección contraria ás agullas do reloxo e que mantén normalmente esa masa polar confinada nas rexións árticas.
Cando o vórtice se desestabiliza, o que sucede de forma periódica, o aire frío desprázase cara ao sur do planeta, causando a baixada das temperaturas. As previsións do NWS son que o vórtice polar seguirá desestabilizado: a mediados da próxima semana unha nova masa de aire polar engulirá a parte setentrional do centro e oeste de Estados Unidos. "As boas noticias son que a fin de semana será magnífica. As malas noticias que a masa azul escura de temperaturas por baixo do normal estará de volta a próxima semana", advertiu o NWS en Twitter.
