O ministerio de Sanidade, Consumo e Seguridade Social ordenou retirar un lote do medicamento Deflazacort Sandoz, do grupo dos corticoesteroides sistémicos con propiedades antiinflamatorias e anticolinérxicas, debido a un erro no prospecto.
Segundo informou a Axencia Española de Medicamentos e Produtos Sanitarios (Aemps) a alerta foi activada este venres e afecta o lote N012 do medicamento "Deflacort Sandoz 6 mg comprimidos EFG, 20 comprimidos", con data de caducidade o 31 de xaneiro de 2022.
Sanidade ordenou a retirada do mercado de todas as unidades distribuídas do citado lote e pediu que sexan devoltas ao laboratorio polas canles habituais debido a un erro no prospecto, que indica que se trata de Deflazacort "Sandoz 30 mg comprimidos EFG, 10 comprimidos".
Este medicamento utilízase en caso de enfermidades reumáticas, do coláxeno e da pel, así como alérxicas, pulmonares, oculares, hematolóxicas, gastrointestinais, hepáticas e renais, segundo o fabricante do fármaco.
