O director xeral de Tráfico, Pere Navarro, propuxo este martes que os concellos cren oficinas con responsables de peóns, do mesmo xeito que xa as hai para as bicicletas, pois está convencido de que os desprazamentos a pé marcarán as políticas de mobilidade urbana nos próximos anos.
Pere Navarro inaugurou o primeiro Foro Cidades a pé organizado pola Dirección Xeral de Tráfico (DXT) en colaboración coa Empresa Municipal de Transportes de Madrid e a Fundación Conama. "Gustaríanos que igual que hai un responsable ou a oficina das bicicletas nos concellos algún día haxa o responsable do peón ou a oficina dos peóns", recalcou Navarro.
O máximo responsable da DXT recordou que no último ano morreron 350 peóns -o 61 por cento deles homes e o 38 por cento mulleres- e destacou que os maiores de 65 anos supuxeron o 71 por cento do total de viandantes falecidos nas cidades. "Levamos uns anos apostando polas bicicletas polo que supón dunha forma distinta de organizar a mobilidade na cidade e por iso fixéronse carrís bici, e as mesmas xa son algo normal na paisaxe das cidades", comentou Pere Navarro.
Engadiu que "a DXT ten a impresión de que despois das bicicletas veñen os desprazamentos a pé, que van entrar con forza". "Cando os desprazamentos a pé sexan un dos centros da política de mobilidade da cidade van ser un motor de transformación das cidades moi potente e na boa dirección", apostilou.
Navarro subliñou que outro factor que tamén hai que ter en conta é que "en España hai máis maiores de 65 anos que menores de 16 e a xente maior camiña, uns por prescrición médica e outros por manter a saúde". E advertiu: "Son moitos e votan, co que van marcar a política de mobilidade e un dos elementos básicos e fundamentais serán os desprazamentos a pé".
Por iso estimou que "pronto empezaremos a ouvir falar dos obstáculos que hai nas beirarrúas e dos tempos verdes dos semáforos, que actualmente están a un metro por segundo, que é a velocidade típica, aínda que para cruces grandes e para xente maior é cuestionable e veremos como se reivindica algún segundo máis". "Cando saíu o tema dos patinetes os concellos empezaron pedir á DXT que regulase algo e agora este debate está pechado e nestes momentos a beirarrúa é só para os peóns", resolveu.
