Tres cans de raza pitbull atacaron este pasado martes a unha muller que paseaba cos seus dous cans e mataron a un deles no municipio da Selva de Camp (Tarragona), segundo confirmaron a Efe fontes policiais.
A muller e as súas dúas mascotas paseaban polas aforas do municipio e, ao pasar por diante dunha leira valada, ouviu ladrar a uns cans, pero non lle deu importancia. Ao pouco, xurdiron tres cans de raza pitbull -considerada potencialmente perigosa-, o can da muller saíu fuxindo, e ela colleu á femia en brazos con intención de saír correndo, pero os tres cans atacáronas.
Segundo avanzou este venres o Diari de Tarragona, a muller sufriu mordeduras en brazos e pernas, pero a súa cadela morreu por mor das lesións. A muller denunciou os feitos aos Mossos d'Esquadra, que os investigan.
Dous dos cans pertencen á leira valada, da que lograron escapar e están identificados co seu correspondente chip, pero o terceiro carece deste elemento, non se sabe quen é o seu dono e quedou en corentena.
