O pleno de Barcelona aprobou este venres unha proposición que rexeita a sentenza do Tribunal Supremo polo 1-O, pide a liberdade dos políticos independentistas presos e "o libre retorno" dos que marcharon de España, e defende o dereito de autodeterminación. A proposta, presentada por ERC e JxCat por separado pero co mesmo texto, foi transaccionada con BComú, o que permitiu que prosperase cos votos favorables destes tres grupos municipais.
O texto foi rexeitado por PSC, Cs, PP e BCN Canvi, nunha votación que dividiu o voto dos socios do goberno municipal formado por comúns e socialistas. Os líderes de ERC e JxCat no consistorio, Ernest Maragall e Elsa Artadi, coincidiron en que o texto acordado con BComú é "de mínimos", aínda que dixeron que recolle o que —din— pensan o 80% dos cataláns.
"O que sucedeu estes días non é o final de nada, é o principio de todo. Pero temos un Estado cego e xordo", afirmou Maragall, en relación ás mobilizacións da última semana tras a sentenza.
SÁNCHEZ A TORRA. Este mesmo venres, o presidente do Goberno en funcións, Pedro Sánchez, asegurou que segue pensando que o president da Generalitat, Quim Torra, aínda non condenou a violencia e acusouno de sinalar "aos Mossos" cando anuncia unha investigación para depurar responsabilidades no corpo polas cargas nos disturbios na rúa.
Nunha entrevista na Sexta, admitiu que sentiu "vergoña" ao ver como funcionarios do Hospital Sant Pau de Barcelona organizaron unha protesta hai uns días con motivo da súa visita aos policías ingresados polas súas feridas nos disturbios. Nesa visita, dixo, non o recibiu "nin a dirección do hospital público" por indicación, imaxina, da Generalitat, á que sinalou tamén como responsable da organización da protesta.
"Sentín tristeza por ese feito e un enorme orgullo pola Policía Nacional e os médicos" que están a atender aos axentes feridos, dixo. Sánchez condenou que os axentes hospitalizados non reciban unha chamada de Torra agradecéndolles o seu defensa "das liberdades dos cataláns fronte aos violentos".
O socialista tamén advertiu ao presidente da Generalitat de que antes de chamar ao presidente do Goberno español o que ten que facer é unha "chamada de tarifa urbana" aos líderes do PSC, Cidadáns e o PP en Cataluña, cos que hai meses" que non fala.
A manifestación, formada principalmente por mozos, saíu de praza Universitat, pasou polas prazas de Catalunya e Urquinaona e descendeu por Via Laietana. Ao pasar ante a Xefatura Superior da Policía Nacional, custodiada por unha decena de furgonetas de antidisturbios de Mossos d'Esquadra, os manifestantes gritaron 'Urquinaona volverémolo a facer' —en referencia aos altercados de hai unha semana— e 'Non é violencia é autodefensa'.
Esta marcha reuniu a practicamente a metade das persoas que reunira pouco antes unha concentración na praza Sant Jaume.
