A dirección de Podemos cre que Íñigo Errejón debería abandonar o seu escano de deputado "en coherencia" coa súa decisión "persoal e unilateral" de ir ás eleccións con outro "partido", pero recalca que é el quen debe decidilo e que non dedicará "nin un minuto máis" a falar da súa situación interna. "Como dirección non temos máis nada que dicir", recalcou este luns a coportavoz de Podemos, Noelia Vera, tras a reunión do Consello de Coordinación do partido que, segundo dixo, centrouse case exclusivamente en analizar a posición do partido respecto dos orzamentos xerais do Estado.
Vera incidiu en que a militancia está a dicir de forma "contundente" que Errejón debería abandonar o seu escano no Congreso de acordo coa súa decisión de concorrer como candidato á Comunidade de Madrid coa plataforma de Manuela Carmena, Más Madrid, en lugar de con Unidos Podemos.
A dirixente da formación morada precisou ademais que, despois desta decisión "inesperada" do seu candidato, é agora a dirección do partido en Madrid a que determinará os próximos pasos a seguir. Déixase así "marxe" e "liberdade" á dirección rexional, co seu secretario xeral á cabeza, Ramón Espinar, ben para elixir un novo candidato ou ben para negociar coa plataforma de Manuela Carmena.
No entanto, Vera precisou que a Executiva nacional ten "bastante claro" que Podemos estará nas eleccións autonómicas, "posiblemente" como Unidos Podemos e en confluencia con Izquierda Unida, porque iso foi o que decidiu a militancia, dixo. Descartou deste xeito calquera negociación con Errejón e Carmena. "Quen se vai cunha decisión unilateral e personalista ten pouca vontade de negociación e fixo máis ben unha ruptura de pontes", advertiu a dirixente de Podemos.
Por iso, segundo dixo, non van estar "pendentes dunha chamada ou de chamar" ao deputado, que "se quere confrontar non o vai conseguir". Insistiu, en calquera caso, na necesidade de esperar ao que decida a dirección rexional, que aínda está "a procesar" o ocorrido, respecto de Errejón e tamén ao resto de compoñentes da candidatura á Comunidade de Madrid que, do mesmo xeito que o deputado, foron elixidos en primarias.
Sobre a candidatura de Barcelona, o secretario de Organización de Podemos, Pablo Echenique, sinalou que será Podem a que decida o candidato e que os detalles do procedemento serán "axustados" polas direccións municipais e autonómicas en coordinación coa estatal coa que as relacións son "excelentes" e "fluídas".
Preguntado por se os estatutos de Podemos permiten que as direccións municipais decidan non facer primarias para elixir aos seus candidatos, Echenique dixo que o que ocorrerá en Barcelona "non ten que ver con regulamentos", senón coas "particularidades" da cidade.
