Unha muller á que a policía lle deu o alto nun control de tráfico en Florida respondeu á pregunta de se levaba algo máis sacándose un caimán do pantalón, segundo a Oficina do Alguacil do condado Charlotte (suroeste do estado).
Ao revisar o seu coche, os policías descubriron que había máis de 40 tartarugas de barro raiadas (Kinosternon baurii), unha especie endémica do sueste dos Estados Unidos.
Un dos axentes fíxolle entón á muller a pregunta para saber se levaba algo máis e para a súa sorpresa, ela mostroulle un pequeno caimán dun pé de longo (30,5 cms) que ocultara dentro do pantalón cando lle deron o alto, segundo o relato feito pola oficina do alguacil nas redes sociais.
A Florida Fish and Wildlife Conservation Commission, o organismo que coida da fauna e a vida silvestre neste estado, abriu unha investigación á muller, da que non se facilitou o nome.
A propia Oficina do Alguacil de Charlotte catalogou o suceso como digno dunha exitosa campaña en redes sociais para reunir todas as historias estrañas que teñen como protagonistas a homes de Florida baixo a etiqueta #Floridaman.
Como tamén as mulleres floridanas fan das súas enseguida creouse a etiqueta #Floridawoman, onde o caso desta muller ocupa xa un espazo por dereito propio co título "Un caimán sae dun pantalón de ioga".
A poboación de caimanes americanos (Alligator mississippiensis), unha especie que de 1967 a 1987 estivo incluída na lista de animais en perigo nos Estados Unidos, suma hoxe uns 1,3 millóns de exemplares e mantense estable desde hai décadas.