Cun reloxo que marca as horas dos rezos e un compás para orientarse cara á Meca, SalamWeb promociónase como o primeiro navegador baixo a lei islámica ou sharía co fin de iniciar unha revolución musulmá en internet.
"A Xeración M, os mozos musulmáns con fortes crenzas na fe e habilidosos coa tecnoloxía, buscan solucións máis prácticas sobre as súas necesidades", declara a Efe Hajjah Hasni Tsarina, directora xeral da compañía SalamWeb Technologies, nun correo electrónico.
Con máis de 1.800 millóns de musulmáns no mundo, un 24% da poboación mundial, a empresa con sede en Kuala Lumpur ve unha "enorme oportunidade" nun nicho de mercado por explotar e "potencial para que a tecnoloxía sexa o facilitador e mellore a vida de cada musulmán".
O navegador web para móbiles e ordenadores, lanzado a principios deste ano, conta cun interfaz sinxelo ao que o usuario pode engadir outras aplicacións vinculadas, todas acordes coa lei islámica. "Desenvolvéronse pautas específicas para SalamWeb en consonancia cos principios da sharía", indica Tsarina, ao precisar que o certificado foi avalado polo Consello Supervisor de Sharia Amanie International, un grupo conformado por eruditos de Arabia Saudita, Kuwait, Catar e Malaisia. Para respectar estes fundamentos, o programa ofrece filtrar as buscas e permite aos usuarios clasificar os portais como: apropiados, neutrais ou inapropiados.
"SalamWeb fundouse coa visión de brindar unha experiencia en liña máis segura, privada e eticamente sensible (...) Isto significa que o contido daniño fíltrase e as visitas a sitios web pornográficos ou inapropiados advírtense cunha alerta anticipada de contido daniño", apunta a directora. Antes de acceder a un portal "inadecuado" aparece na pantalla unha mensaxe de advertencia de cor vermella e deixa ao usuario a opción de continuar cara ao portal non recomendado ou volver ao comezo.
Un dos compromisos do navegador, segundo os seus creadores, é "combater" as noticias falsas a través de medios de confianza e con informacións personalizadas sobre o que acontece no mundo. "A tecnoloxía está en constante cambio e o noso mundo presente é novo, con retos e oportunidades descoñecidas", apunta a responsable da empresa tecnolóxica.
Co obxectivo de cumprir co alicerce do azaque ou esmola —un dos cinco preceptos fundamentais do islam—, o navegador conta coa aplicación adicional SalamSadaqah. Con cada procura realizada a través de SalamWeb ou informe de contido realizado, a empresa igualará a acción doando unha cantidade a causas benéficas. O usuario tamén pode facer doazóns directas a causas como a construción de escolas, mesquitas ou residencias para musulmáns, ademais de apoiar a familias para sufragar o pago de intervencións cirúrxicas.
O navegador, desenvolvido desde 2016 baixo o código aberto Chromium e ao que se lle pode engadir tamén un programa de mensaxería, está dispoñible en varios idiomas como inglés, bahasa (malasio e indonesio), urdu, bangaldesí e arábe. E aínda que se rexa polos principios islámicos "calquera persoa sen importar idade ou credo" pode utilizalo, apuntan desde a compañía.
