O presidente do Goberno, Mariano Rajoy, afirmou este luns que se se fan "as cousas ben superarase o prognóstico oficial de crecemento do Executivo do 2,7% para este ano e dunha creación de 475.000 novos empregos para o exercicio.
En declaracións tras visitar as obras do tramo Vilaboa-Ermida da autovía A-57 en Pontevedra, Rajoy explicou que a anterior previsión de crecemento do 2,3% debíase á existencia dalgunhas "incertezas", pero a evolución dos acontecementos e a mellora das previsións dos distintos organismos motivou a revisión á alza de catro décimas realizada polo Goberno sobre o seu prognóstico para este ano, ata o 2,7%.
"Creo que se facemos as cousas ben podemos romper o noso propio prognóstico e chegar a un crecemento maior", apuntou Rajoy, quen recordou que o Goberno superou as súas propias previsións "todos os anos" e que tamén quere romper o seu prognóstico de 475.000 novos empregos para este ano, xa que os últimos tres exercicios superouse a barreira dos 500.000 novos postos de traballo.
Neste sentido, Rajoy destacou que tras unha etapa económica "moi dura", con cinco anos de recesión, nos últimos catro exercicios España rexistrou crecemento, e tres deles liderándoo a nivel europeo ao crecer por encima do 3%. Sobre o proxecto de lei de Orzamentos Xerais do Estado para 2018, que o ministro de Hacienda, Cristóbal Montoro, presentará este martes no Congreso, Rajoy recordou que a crise foi "dura" e perdéronse 70.000 millóns de euros de recadación, aínda que "agora xa se poden facer algunhas cousas que non se puideron facer noutros momentos".
En concreto, subliñou que o Goberno subscribiu un acordo cos sindicatos para subir o Salario Mínimo un 4% este ano, un 5% en 2019 e un 10% en 2020, así como outro para subir o soldo dos funcionarios entre un 6,1% e un máximo do 8,8% nos tres próximos anos.
De igual forma, destacou que os novos Orzamentos recollerán unha subida do 3% das pensións mínimas e incrementos para as de viuvez, así como algúns axustes no IRPF para que "moitos españois" que na actualidade presentan rendas de entre 12.000 e 18.000 euros paguen "algo menos do que están a pagar nestes momentos". Á súa vez, resaltou que as novas contas públicas incluirán outras "cousas importantes", como desgravacións para o pago da gardería ou o aumento á atención das familias numerosas.
"SECTARISMOS". "Na medida en que en España sexamos capaces de facer política seria, seguir crecendo e creando emprego o grande obxectivo nacional (20 millóns de ocupados) dos próximos anos poden alcanzarse", apostilou Rajoy, quen salientou que España está "en condicións" de superar definitivamente a crise.
Ao seu xuízo, hai unha "grande oportunidade" para deixar atrás a crise nun contexto no que os países da contorna crecen, e o sector exportador é "dinámico" e "decisivo". Por iso, insistiu en que se se fan "as cousas ben", poderase seguir aumentando o emprego, a recadación e construír máis infraestruturas que axuden a seguir xerando crecemento e contribuíndo a ese "círculo virtuoso" ao que se debe "aspirar", mantendo a política de estabilidade orzamentaria e as reformas estruturais.
O líder do Executivo defendeu a implementación de políticas "que funcionen e beneficien á xente, sen sectarismos, xa que a historia demostrou que serven para pouco ou para nada".
