O presidente do Goberno, Pedro Sánchez, deu a Nicolás Maduro un prazo de 8 días para convocar "eleccións libres e democráticas" en Venezuela e se non recoñecerá a Juan Guaidó como presidente de Venezuela.
"Non buscamos pór ou quitar gobernos en Venezuela, queremos democracia e eleccións libres e transparentes en Venezuela", dixo o presidente do Goberno nunha declaración institucional realizada en Moncloa.
Sánchez explicou que "Venezuela vive desde hai moitos anos unha gravísima crise económica, política e social" e destacou que "en todo momento España liderou a posición da UE" respecto dese país.
Sánchez xa trasladou a Guaidó o xoves, por medio dunha chamada telefónica realizada nun receso do Foro de Davos, a "coraxe" que está a demostrar como presidente da Asemblea Nacional.
O pasado mércores 23 de xaneiro Juan Guaidó declarouse a si mesmo presidente de Venezuela ao considerar ilexítimo o novo mandato de seis anos asumido por Nicolás Maduro o 10 de xaneiro e ser el a seguinte autoridade constitucional do país. Guaidó foi recoñecido por Estados Unidos, Colombia e Brasil, entre outros países.
Este venres, na rolda de prensa posterior ao Consello de Ministros, o ministro de Asuntos Exteriores, Josep Borrell, asegurou que o Goberno propuxo aos seus socios da UE que esixa ao "réxime" venezolano a convocatoria de eleccións cun "prazo temporal" e que, se non o cumpre, expóñase outras medidas como "o recoñecemento do presidente interino, para que sexa a Asemblea quen convoque as eleccións".
Nicolás Maduro respondeu á esixencia formulada Borrell dicindo que o que debe facer España é convocar eleccións xa que Pedro Sánchez non foi elixido nas urnas, e acusou o presidente do Goberno de repetir o guión de José María Aznar e incluso situarse á dereita.
