O presidente do Goberno, Pedro Sánchez, defendeu este luns a presenza do rei nos actos do aniversario dos atentados de Barcelona e Cambrils (Tarragona) a pesar das críticas dos secesionistas e subliñou que "Felipe VI entende a España plural" e "sempre tendeu pontes con Cataluña". "Temos un xefe do Estado que entende a España plural, que entende a diversidade do país e que sempre tendeu pontes con Cataluña", asegurou Sánchez en rolda de prensa en Palma, tras despachar co rei no Palacio de Marivent.
Sánchez foi preguntado polas palabras do presidente do Parlamento balear, Baltasar Picornell, cando a semana pasada dixo percibir que o rei quería "tender pontes" cos independentistas. "Eu non son portavoz de ninguén. A casa real e o xefe do Estado exprésanse nas súas intervencións e hai que interpretar as súas intervencións públicas, que creo que son bastante claras", contestou Sánchez, en cuxa opinión "o transcendental" é que o rei "recoñece e recoñécese nesa pluralidade e esa diversidade".
Respecto das críticas do presidente catalán, Quim Torra, á presenza de Felipe VI na homenaxe polo primeiro aniversario dos atentados, Sánchez deixou claro que acudirán tanto o rei como a raíña e el mesmo, así como outros membros do seu Goberno, nun acto de "normalidade" para mostrar a súa repulsa polo terrorismo e a súa solidariedade coas vítimas e as familias.
O xefe do Estado acode "en representación do conxunto da sociedade española, para mostrar o respecto, o agarimo e a empatía aos familiares", recalcou Sánchez, convencido de que con esa mensaxe "convócase á absoluta maioría da sociedade catalá e á absoluta maioría da sociedade española".
E é que o importante, segundo o seu punto de vista, é "non esquecer" a razón deses actos e deixar claro que "non hai fisura" na loita contra o terrorismo nin no apoio ás vítimas e familiares. "Aí imos estar todos, desde o primeiro ata o último dos españois", engadiu, co argumento de que con esa homenaxe preténdese trasladar a solidariedade, o respecto, o recoñecemento ás persoas que perderon a vida, aos seus familiares e ás cidades que viron atacada a súa convivencia "por persoas que non cren nesa convivencia, nos dereitos e liberdades".
Durante a rolda de prensa, Sánchez explicou que tamén informou ao rei da reunión da Comisión Bilateral entre o Goberno e a Generalitat celebrada o pasado mércores, despois de sete anos inactiva. E detalloulle que en setembro comezarán os traballos posteriores á mesma, como a transferencia de competencias, o estudo dos recursos de inconstitucionalidade, as políticas do transporte ou o impulso ao investimento do Corredor Mediterráneo.
Neste sentido, fixo fincapé na importancia que o Goberno está a dar á cooperación interinstitucional, sobre todo coas comunidades autónomas.
