O servizo de pagos electrónicos con tarxetas Visa sufriu este venres unha interrupción en todo o continente europeo, o que provocou problemas nalgunhas transaccións, segundo informou un portavoz da compañía.
"Visa está actualmente experimentando unha interrupción do servizo. Este incidente está a impedir que se procesen algunhas transaccións en Europa", sinalou a fonte.
A empresa, que ten en Londres a súa sede europea, afirmou que investiga as causas do problema e traballa "tan rápido como é posible para resolver a situación".
Unha portavoz do Banco Royal Bank of Scotland confirmou que "algúns clientes están a experimentar problemas ao utilizar os seus cartóns de débito".
A empresa investiga as causas do problema e traballa "tan rápido como é posible para resolver a situación"
A entidade británica detallou que os seus clientes "continúan podendo acceder a diñeiro en efectivo a través da rede de caixeiros automáticos".
Lloyds Banking Group indicou, pola súa banda, que está ao tanto dun "problema amplo da industria que está a afectar aos pagos de Visa" e sinalou que "as transaccións en caixeiros automáticos e de Mastercard non están afectadas".
Un portavoz do Banco de Inglaterra asegurou que a entidade emisora está "en contacto" con Visa e "traballando" coa empresa para tratar de determinar as causas e as posibles solucións a un problema que comezou a detectarse á primeira hora da tarde en Europa.
A cadea de supermercados Asda puntualizou que as interrupcións dos pagos nas súas tendas comezaron a producirse de forma "esporádica" a partir das 14.00 GMT. "Algúns pagos transferíanse e outros non. Estamos a dicir aos clientes que o efectivo é a mellor forma de pagar", dixo esa fonte ao diario The Guardian.
Os medios británicos recollen testemuños de persoas que viron como as súas tarxetas eran rexeitadas en comercios do Reino Unido.
