O director do Centro de Coordinación de Alertas e Urxencias Sanitarias, Fernando Simón, asegurou este venres que non lle molesta que se estean vendendo camisetas e outros obxectos coa súa imaxe, aínda que si pediu a quen o faga que, "se pode facelo", doe "unha pequena porcentaxe" das súas vendas a ONG.
Durante unha rolda de prensa na Moncloa, na que, xunto co ministro de Sanidade, Salvador Illa, informou sobre as últimas novidades da desescalada da crise do Covid-19 no país, Simón foi preguntado polos medios sobre a súa opinión acerca dos obxectos de merchandising que se están vendendo coa súa cara impresa e algunhas das súas frases en anteriores roldas de prensa. "Non me molesta", indicou, para engadir que é "un afago" que a xente se preocupe por el e, "en moitos casos con moito agarimo".
Segundo explicou, recibiu nestes meses "cartas e outras comunicacións" de xente que lle demostra o seu "afecto" e espera "cando teña tempo" poder responder a todos.
CAMISETAS E BOLSAS DE PRAIA. "Para nada moléstame a fama, aínda que cando vas pola rúa xa non é tan fácil moverse, pero estou encantado", indicou. Tampouco se mostrou molesto porque haxa xente que use a súa imaxe "para un negocio que lles poida parecer rendible". "Se que hai camisetas e bolsas de praia", recoñeceu. Neste sentido, apuntou que o que si lle gustaría é que estes negocios doasen unha parte á ONG.
"Gustaríame que, se se pode, e xa que a miña imaxe está aí, doasen unha pequena porcentaxe a ONG, se lles vén ben", concluíu.
