A ata agora subdirectora xeral de Farmacia do Sergas, Carolina González-Criado, investigada por homicidio imprudente na causa da Hepatite C, deixa a Administración autonómica para asumir un novo labor no Ministerio de Sanidad, por mor dunha oferta do departamento de Dolors Monserrat.
Segundo confirmaron fontes da Xunta a Europa Press, o Ministerio de Sanidad solicitou a incorporación de Carolina González-Criado, que é funcionaria, para participar nun estudo relacionado coa área farmacéutica, polo que esta solicitou o cesamento "a petición propia".
As mesmas fontes puntualizaron que non está previsto que se incorpore ata principios de abril ao seu novo labor, para participar nun estudo relacionado coa área farmacéutica, a petición do Ministerio de Sanidad.
O diario.es avanzou a fichaxe por parte do Ministerio de González-Criado, imputada por homicidio imprudente por atrasar fármacos da hepatite C "con razóns orzamentarias" a seis pacientes que acabaron morrendo, polo que deixa o Goberno galego para incorporarse ao Ministerio que dirixe Dolors Montserrat.
INVESTIGACIÓN. Ademais de González-Criado, está investigado o xerente da área sanitaria viguesa, Félix Rubial, entón director de Asistencia Sanitaria, no procedemento aberto pola subministración dos tratamentos aos enfermos afectados por Hepatite C por un suposto delito de homicidio en seis dos oito casos que inclúe a causa.
A investigación aberta do Xulgado de Instrución Número 3 de Santiago trata de aclarar se houbo un atraso ilícito na avaliación de pacientes con Hepatite C, necesaria para que puidesen recibir os tratamentos.
O xuíz decidiu investigalos por prevaricación, aínda que a Fiscalía atribuíalles tamén un suposto delito de homicidio "por imprudencia profesional grave" ao atrasar a administración dos fármacos "por razóns orzamentarias", situación que estimou a Audiencia Provincial da Coruña.
