Os taxistas de Madrid manteñen a folga indefinida, que cumpre este venres cinco días, ao considerar "totalmente insuficiente" a proposta pactada pola Comunidade de Madrid e o Concello da capital para regular a actividade dos vehículos de aluguer con condutor (VTC).
Logo de reunirse coa alcaldesa, Manuela Carmena, o presidente da Federación Profesional do Taxi, Julio Sanz, afirmou que o borrador da proposta "non se parece en nada" ás peticións do colectivo de taxistas.
Segundo o borrador, de nove páxinas, o usuario dun VTC debe atoparse a unha distancia mínima de 300 metros do vehículo para poder contratalo, o que, a xuízo dos taxistas, é "unha anécdota ou unha burla".
No entanto, Sanz dixo que o texto merece "estudo e reflexión" e que a proposta "non debe ser o fin", xa que é necesario "seguir traballando e explorando diferentes opcións".
De momento, os máis de mil taxistas que seguen apostados fronte ao recinto feiral de Madrid (Ifema) mostraron un claro rexeitamento á proposta. Segundo indicou aos concentrados o portavoz da Plataforma Caracol, Saúl Crespo, a proposta supón "rirse" dos taxistas "na súa cara".
O presidente da Comunidade de Madrid, Ángel Garrido, e a alcaldesa Carmena anunciaran este venres pola mañá un preacordo entre ambas as administracións para regular os VTC mediante unha "distancia mínima" na contratación.
Nunha comparecencia conxunta ao finalizar o acto do Día de Madrid en Fitur, ambos explicaron que se optou por fixar unha distancia e non un tempo de precontratación, como fará Cataluña, polos problemas legais que implicaría esa alternativa, que poderían supor "sancións millonarias".
QUINTO DÍA DE FOLGA. A quinta xornada de folga transcorreu con calma xunto aos recintos feirais, punto central das protestas, e con atascos no centro da cidade, provocados por unha marcha lenta dos taxistas.
Unha caravana saíu á primeira hora da mañá do cemiterio da Almudena e atravesou as rúas de Alcalá, Goya e Génova, pasando por diante das sedes de Ciudadanos e do PP.
Ademais, oito taxistas (sete homes e unha muller) comezaron unha folga de fame.
En Barcelona, os traballadores de VTC manifestáronse polo centro da cidade, sen interromper o tráfico, para pedir diálogo tanto ao Concello como á Generalitat. Posteriormente, reuníronse con responsables do Goberno catalán a quen trasladaron o seu rexeitamento á norma que elaborou para regular os VTC, que se asinará o vindeiro martes.
O presidente da patronal Unauto en Cataluña, Josep María Goñi, dixo non entender que se expulse de Barcelona", unha cidade de referencia para a telefonía móbil, "ás dúas aplicacións máis importantes do mundo do transporte público de persoas", Uber e Cabify.
