O presidente da Generalitat, Quim Torra, chegou ao Tribunal Supremo para seguir desde o Salón de Plenos o xuízo polo procès independentista catalán.
Torra chegou pouco antes das 9 da mañá ás inmediacións do tribunal, onde se atopou co presidente do Parlament, Roger Torrent; políticos de partidos soberanistas, dirixentes das entidades independentistas ANC e Ómnium Cultural e familiares dos presos. Todos pousaron tras unha pancarta na que se lía "Decidir non é delito".
Posteriormente, o presidente da Generalitat trasladouse en coche ata a porta do Supremo, e entrou ao edificio, onde foi saudado polo presidente do Tribunal e do CGPJ, Carlos Lesmes.
No saúdo, que tivo lugar no despacho oficial do presidente do TS, tamén estiveron presentes o vicepresidente do tribunal, Ángel Juanes; o conseller de Territorio a Generalitat, Damià Calvet, e o delegado da Generalitat en Madrid, Ferran Mascarell.
Torra seguirá este martes a primeira sesión do xuízo ao procès desde o Salón de Plenos do Tribunal Supremo, no que ten asento reservado como presidente dunha comunidade autónoma.
O tribunal reservou para este martes tres sitios para o Govern, dous para representantes do Parlamento catalán e outros dous para o vasco.
