A Casa do Rei aclarou que o saúdo entre don Juan Carlos e o príncipe herdeiro de Arabia Saudita, Bin Salmán, ao que se considera instigador do asasinato do xornalista Jamal Khashoggi, foi "estritamente protocolario e sen transcendencia institucional". Así o sinalaron fontes do Palacio da Zarzuela, que recordaron que, desde que abdicou, o Rei emérito acudiu todos os anos con carácter privado ao Gran Premio de Fórmula I de Abu Dhabi.
Nesta ocasión, don Juan Carlos coincidiu na zona de autoridades con Bin Salmán e foi aí cando se produciu o saúdo "estritamente protocolario" sen que estivese precedido nin seguido de ningún tipo de reunión. O saúdo, xa que logo, non tivo "transcendencia institucional", recalcan as fontes.
Nun primeiro momento, a Casa do Rei non quixo facer comentario algún sobre a foto do saúdo entre o monarca emérito e o príncipe herdeiro por tratarse dunha "actividade privada", pero posteriormente optaron por precisar que se tratou dun saúdo estritamente protocolario. O saúdo foi captado polos fotógrafos e a imaxe difundida polas canles de comunicación do reino saudita.
Podemos e Cs critican o monarca emérito: non era o momento de que se producisen ese encontro e esa foto
Tanto a portavoz do Goberno, Isabel Celaá, como o PSOE evitaron valorar a oportunidade desa imaxe, aínda que a portavoz do Comité Electoral socialista, Esther Peña, derivou á Casa Real a responsabilidade de dar explicacións. "Entendemos que non era un evento oficial, non estaba na axenda oficial. Non opinamos, seguramente a Casa Real poderá dar algunha explicación respecto diso", sinalou Peña en rolda de prensa.
O ministro de Exteriores, Josep Borrell, desvinculou ao Goberno español deste encontro sinalando que "o Goberno non é responsable da axenda do Rei emérito" e tachando a coincidencia de "casual".
CRÍTICAS DE CIUDADANOS E PODEMOS. Ciudadanos e Podemos si entraron en cambio a criticar esa imaxe. "Non era o momento de que se producisen ese encontro e esa foto", dixo o secretario xeral de Cs, José Manuel Villegas, aludindo ao papel aínda non aclarado que Bin Salman puido ter no asasinato de Khashoggi.
A portavoz adxunta de Podemos no Congreso, Ione Belarra, acusou ao monarca emérito de danar a imaxe internacional de España e esixiu ao Rei Juan Carlos —que viaxou a Emiratos Árabes acompañado da súa filla a infanta Cristina— que dea explicacións.
