Nun ano de marcas para o Camiño de Santiago en pleno Ano Santo, as cifras revelan un incremento dos peregrinos que escollen o bautizado como Camiño exprés, é dicir, iniciar a ruta en Sarria para completar os 100 quilómetros esixidos a pé para lograr a Compostela.
Ante este fenómeno, os municipios que se sitúan antes desta localidade luguesa reivindícanse e avisan aos camiñantes que, ao optar polo traxecto mínimo, deixan atrás lugares "máxicos" como a zona da montaña de Lugo.
Así o di a alcaldesa de Triacastela, Olga Igrexas, que invita as persoas que pensan en facer o Camiño proximamente en elixir unha vía un pouco máis longa e non se esquezan dun "lugar tan máxico como o traxecto que une O Cebreiro con Sarria".
O concello lucense de Triacastela reclama ao "peregrino de longa distancia" tras un verán no que o Camiño de Santiago volve a bátir marcas, pero no que trazados como este se están quedando no esquecemento.
A alcaldesa de Triacastela, Olga Igrexas, lamenta que cada ano sexan máis os que saen de Sarria "deixando atrás unha zona máxica como son os bosques de O Cebreiro e Triacastela".
Segundo os últimos datos publicados pola Oficina do Peregrino, en xullo foron 34.839 os peregrinos que escolleron como ruta o Camiño Francés, aínda que existen diferenzas entre o lugar de partida.
Deste total, case 21.000 tomaron Sarria como saída, a distancia mínima para conseguir a Compostela. Con todo, só 1.312 foron quen decidiron emprender a súa aventura desde O Cebreiro.
A rexedora popular sente que son moitos os que se están "esquecendo" do seu concello e por iso recorda que Triacastela xa era no Códice Calixtino recollida como "o final da etapa número once".
Recoñece que cada un é libre de elixir como fai a súa peregrinación", pero lamenta que sexan moitos os que se estean perdendo "unha das etapas máis bonitas".
A tendencia cambiou desde os anos 1990, cando o Camiño Francés era o dominador nas rutas para chegar a Santiago, ao ser escollido polo 95% dos camiñantes. Na actualidade, supón o 50% do caudal de viaxeiros que chegan á Praza do Obradoiro.
Nos últimos anos, por contra, opcións como a do Camiño Primitivo, o do Norte ou o Portugués viron multiplicadas as súas estatísticas.
As cifras apuntan que a tendencia de percorrer o número imprescindible de quilómetros está en auxe e sitúase como opción preferente para o groso de peregrinos.
O descenso de peregrinaxes de longa distancia está a afectar, sobre todo, a comunidades como Castela e León ou Aragón, e implicitamente, a concellos galegos como Triacastela.
