A Xunta e a Cruz Vermella presentaron este luns o dispositivo posto en marcha de forma conxunta con motivo do ano Xacobeo durante este mes de agosto para proporcionar unha atención global aos peregrinos e peregrinas que realizan a ruta.
O vicepresidente primeiro, Alfonso Rueda, a presidenta autonómica de Cruz Vermella, Carmen Colmeiro, e a directora xeral de Relacións Externas e Comunicación de Mapfre, Eva Piera, deron conta desta iniciativa que se pretende prolongar durante o verán de 2022 e a outros itinerarios.
O acordo inclúe patrullas móbiles de socorristas que percorrerán o Camiño polas mañás de mércores a domingo en bicicleta para prestar acompañamento, asistencia e asesoramento aos peregrinos, mentres que polas tardes funcionarán os puntos fixos de asistencia en Portomarín, O Pino e no Monte do Gozo.
Tanto os postos como as patrullas estarán a disposición dos camiñantes para o que precisen e o persoal —5 socorristas e 1 coordinadora do operativo— contarán coa formación e os materiais necesarios para a prestación de primeiros auxilios.
O dispositivo complétase cun vehículo de apoio dotado co equipamento preciso para dar resposta a situacións que superen o nivel de asistencia das patrullas.
Alfonso Rueda destacou a aplicación de todos os protocolos anticovid nas rutas e o reforzo da seguridade coa vixilancia por parte das forzas de corpos de seguridade, así como a través da posta en marcha do Plan de Protección Civil de atención ao peregrino con voluntarios despregados en máis dun centenar de concellos aos que se sumarán os efectivos da Cruz Vermella.
