A cantante irlandesa Dolores O'Riordan, líder da banda The Cranberries, morreu o pasado 15 de xaneiro ao afogarse na bañeira do seu hotel en Londres cando estaba ebria, segundo o informe forense presentado este xoves.
A xuíza forense Shirley Radcliffe, do tribunal londiniense de Westminster, dixo ao expor as súas conclusións que a morte aos 46 anos de O'Riordan foi "un accidente", o que xa determinou a Policía ao investigar o caso.
Radcliffe indicou como causa do falecemento o "afogamento por intoxicación etílica", despois de que a autopsia do corpo da artista demostrase que tiña altos niveis de alcol no sangue.
Durante a investigación, a axente de policía Natalie Smart explicou que achou o cadáver da cantante mergullado baixo a auga na bañeira da súa habitación do hotel Hilton, onde se atoparon tamén unha botella de champaña e cinco miniaturas de licores baleiras.
Había ademais varias caixas de medicamentos de prescrición médica, pero os niveis destes no sangue de O'Riordan, que sufría un trastorno bipolar, estaban dentro dos límites permitidos, ao contrario que o grao de alcoholemia.
Segundo o informe, a intérprete entrou no hotel londiniense o 14 de xaneiro, púxose en contacto co servizo de habitacións a medianoite e ás 03.00 hora local (02.00 GMT) chamou á súa nai, tras o cal foi achada e declarada morta polos servizos de urxencia ás 09.16 horas (08.16 GMT) da mañá seguinte.
Durante as pescudas informouse de que Dolores, que este xoves cumpriría 47 anos, respondía ben ao tratamento polo seu trastorno bipolar, aínda que tivera nos pasado períodos de abstinencia do alcol e de consumo excesivo.
Á lectura das conclusións asistiron a nai, o irmán e a cuñada da vocalista, mentres que os Cranberries emitiron un comunicado onde reiteran a súa tristeza pola perda e recordan que a súa amiga e colega "vivirá eternamente a través da súa música".
Dolores O'Riordan, unha das voces máis distintivas de Irlanda, morreu durante unha breve visita a Londres para participar nunha sesión de gravación na que poría voz a unha versión do coñecido tema de
O tribunal de Westminster empezou as súas pescudas o pasado 19 de xaneiro, antes de que a cantante fose enterrada no seu pobo natal de Limerick, entre a conmoción de toda Irlanda.
A artista tiña tres fillos co representante do grupo británico Duran Duran, Don Burton, de quen se separou en 2014 tras 20 anos de matrimonio.
The Cranberries, coas carismática Dolores á cabeza, saltou á fama internacional a principios da década de 1990 con temas como Zombie, Dreams ou Linger e chegou a vender máis de 40 millóns de discos en todo o mundo.
O'Riordan é recordada en Irlanda como "a voz de toda unha xeración" e como unha icona mundial da música dos noventa.
