Tan só unha semana logo de coñecerse a morte de Luke Perry, coñecido por interpretar a Dylan en Sensación de vivir, este luns transcendeu o falecemento doutro dos actores da mítica serie. Trátase de Jed Allan, que interpretaba a Rush Sanders, o pai de Steve. Morreu aos 84 anos.
O fillo do actor, Rick Brown, comunicou a noticia no perfil de Facebook do seu pai. "Grazas a todos os que participastes nesta marabillosa homenaxe ao meu pai", escribiu nunha publicación na que explicou que o intérprete estivo acompañado pola súa familia nos últimos momentos.
O actor Ian Ziering, que daba vida ao seu fillo en Sensación de Vivir, dedicoulle unhas palabras en Instagram. "Moi triste ao decatarme de que perdemos a outro compañeiro de 90210. Tiven a sorte de traballar con Jed Allan de 1994 a 1999. Él interpretou a Rush Sanders, o pai de Steve. Era un gran compañeiro, botaráselle de menos", escribiu.
Jed Allan interpretou ademais ao patriarca da serie Santa Bárbara. Nos últimos anos o actor participou en series como A dous metros baixo terra ou CSI Miami.
