A novela de temática xuvenil e infantil Arnoia, Arnoia, do escritor ourensán Xosé Luís Méndez Ferrín, converterase en videoxogo "co obxectivo de dinamizar didáctica, cultural e turisticamente as Terras de Celanova e da Baixa Limia".
Así o asegurou este xoves a Deputación Provincial de Ourense, que participa no proxecto, a través dun comunicado emitido despois da reunión que mantivo este mesmo día o presidente da institución, José Manuel Baltar, cos impulsores desta iniciativa, Antonio Piñeiro, coordinador cultural no Concello de Celanova; Luz Castro, da empresa Imaxin Software, e Martín López Nores, profesor da Escola de Telecomunicacións da Universidade de Vigo.
Segundo avanzou o ente provincial, o videoxogo poderá ser descargado como unha aplicación móbil e permitirá o seu goce na rede. Así mesmo, terá formato de xogo de mesa e a súa narración estará relacionada coa trama da obra de Méndez Ferrín, que relata a viaxe de Nmógadah, un mozo adolescente de Arnoia desexoso de vivir aventuras.
DINAMIZACIÓN TURÍSTICA E CULTURAL. A versión recreada da novela de Méndez Ferrín, publicada por primeira vez en 1985, consistirá en ofrecer pistas para percorrer turisticamente a comarca de Celanova a través de datos de xeolocalización e axuntará pasaxes de realidade aumentada con escenarios reais, como o alcázar de Milmanda, a ponte de Freixo, Cortiña Grande, Castromao, os ríos Arnoia e Tuño ou A Chaira.
O obxectivo do proxecto, que terá versión en castelán, galego e inglés, é dinamizar didáctica e turisticamente as Terras de Celanova e da Baixa Limia, así como divulgar a literatura dos autores de Celanova por medio de rexistros e linguaxes comunicativos diferentes ao libro.
Outras das metas desta iniciativa é fomentar o uso das novas tecnoloxías para achegar a literatura local aos máis novos e promover o traballo por medio da creación de industria cultural fundamentada no patrimonio do municipio ourensán e da súa zona de influencia.
