Pablo López, Vanesa Martín, Pastora Soler e a banda tributo God Save the Queen son as primeiras actuacións confirmadas do Maestral Music Festival de Sanxenxo. O evento, que se pon en marcha en 2019 coa súa primeira edición, será o primeiro de artistas únicos de Galicia. "Un día, un artista. Un espectador, unha experiencia sen igual. Esa é a filosofía deste festival", explican os organizadores nun comunicado.
Maestral celebrarase entre os días 3 e 23 de agosto de 2019 (ambos os incluídos), e a composición íntegra do seu cartel irase desvelando semana a semana ata completar as 20 citas consecutivas. As entradas estarán dispoñibles desde este venres, e en exclusiva, a través da web de Ataquilla.com; do seu servizo telefónico no 902 504 500; nas sedes Afundación en Vigo (Policarpo Sanz, 26); Santiago de Compostela, (Rúa do Vilar, 19); A Coruña (Cantón Grande, 8) e a Sala de Exposicións da Sede Afundación de Ourense, (Praia Maior, 4).
Algo menos de 3.000 persoas poderán asistir cada día á actuación principal. Concerto, en case todos os casos exclusivo no verán galego, que terá lugar no Auditorio Maestral, un espectacular espazo de butacas que se levantará a partir de xuño de 2019 no Parque Industrial de Nantes, en Sanxenxo, para desaparecer o día 23 de agosto coas últimas notas da voz de Vanesa Martín, que pecha esta primeira edición.
Tras o concerto principal terá lugar unha segunda actuación, "un modo de descubrir pequenas e grandes xoias" da escena nacional e internacional, por exemplo Track Dogs, banda composta por americanos, británicos e irlandeses fincados en Madrid, que farán escala entre as súas citas europeas para actuar en Sanxenxo.
O evento contará ademais con zonas de lecer e gastronomía para todos os gustos. Desde o exclusivo recuncho que, baixo patrocinio de Estrella Galicia, dará cabida a algún dos máis prestixiosos chefs de Galicia, ata food trucks.
Entre as próximas citas, Maestral adianta o concerto que o día 17 reunirá a Nacho García Veiga (Nacha Pop), Javier Gurruchaga (Orquestra Mondragón), Santi Santos (Limones), Carlos Segarra (Los Rebeldes) e Miguel Costas (Siniestro Total) nunha noite na que, acompañados da banda ferrolá Nuevo Plan, levarán a Sanxenxo tres horas de éxitos dos 80 e 90, con parte dos seus protagonistas sobre o escenario. Un pequeno adianto dun cartel repleto de artistas de primerísimo nivel, nun programa conformado para todos os gustos e sensibilidades artísticas, único e irrepetible.
