Kiss volve ser protagonista nunha fachada galega, aínda que agora de forma positiva. Se hai unhas semanas aparecía unha pintada con motivos da banda estadounidense nunha escultura da catedral de Santiago, agora é en Ferrol onde se pode ver unha obra dedicada a este mítico grupo de hard rock.
O seu autor é BJ e a composición forma parte das Meninas de Canido, o evento de cultura urbana que acolle Ferrol estes días.
É unha obra decorativa e vistosa no marco da iniciativa que, desde 2008 e tomando As Meninas de Velázquez como referencia, pretende dar lustre ás parades do deteriorado barrio departamental.