O Betis selou este xoves a súa clasificación para os dezaseisavos de final da liga Europa tras completarse a quinta xornada da fase de grupos. Un gol de Sergio Canles, na fase final da primeira parte, deulle a vitoria ao conxunto que adestra Quique Setién ante o Olympiacos grego (1-0). O quipo andaluz xogarase na última xornada ser primeiro do grupo F no campo do Dudelange luxemburgués.
O Sevilla, quíntuplo gañador da liga Europa, está obrigado a vencer na última xornada ao Krasnodar ruso para non quedar eliminado na fase de grupos, logo de perder pola mínima este xoves, cun gol de Djenepo, en Bélxica fronte ao Standard de Lieja (1-0).
O Vilarreal, pola súa banda, desaproveitou unha inmellorable oportunidade para obter a clasificación matemática para os dezaseisavos do final tras empatar sen goles en Escocia ante o Rangers, nun encontro no que dispuxo de superioridade numérica durante toda a segunda parte.
OUTROS CLASIFICADOS. Ademais do Betis, este xoves selaron o seu pase o Dinamo Kiev, o Salzburgo, o Zenit San Petersburgo, o Fenerbahce e o Sporting de Portugal.
Estes seis equipos únense ao Bayer Leverkusen, ao Zúric, ao Dinamo Zagreb, ao Arsenal, ao Eintracht Frankfurt, ao Lazio e ao Chelsea, que lograron avanzar ás eliminatorias na pasada data.
