O internacional sub 19 Fran Beltrán converteuse este mércores na quinta fichaxe do Celta de Vigo para a tempada 2018-19, despois de que o conxunto galego abonase a súa cláusula de rescisión –oito millóns de euros- en LaLiga.
“O talentoso xogador sobresae polo seu despregamento físico, capacidade defensiva e de recuperación, e unha brillante intelixencia no manexo e saída do balón”, destaca o Celta no seu comunicado de prensa.
O centrocampista, de 19 anos, asina un contrato coa entidade galega ata xuño de 2023, e chega a Balaídos tras despuntar no Raio Vallecano, co que xogou 71 partidos en Segunda División.
Beltrán formouse nas categorías inferiores do Xetafe CF e, desde 2013, nas do Raio Vallecano. Con dezaseis anos integrouse no persoal do Raio B e debutou en Terceira División. No verán de 2016, o novo futbolista deu o salto ao primeiro equipo.
O centrocampista é a quinta fichaxe celeste tras o lateral David Juncá, o central Néstor Araujo e os centrocampistas Okay Yokuslu e Sofiane Boufal.
