O Comité de Competición da RFEF decidiu incoar un expediente ao Real Valladolid e aos seus xogadores Borja Fernández, natural de Ourense, e Keko tras recibir o martes pola tarde unha denuncia do Xirona FC, informa a federación.
"Tras analizar a mesma, na que o Xirona solicita o inicio dun procedemento extraordinario contra o citado club e os futbolistas implicados, este órgano competente en materia disciplinaria tomou esta decisión", sinala a RFEF.
Ademais, nomeouse un instrutor que investigará os feitos e elevará unha proposta de resolución ao Comité de Competición.
O Xirona, descendido a LaLiga 1/2/3, solicitou o martes ao Comité de Competición da RFEF a apertura dun expediente polo suposto amaño do partido Valladolid-Valencia.
O club catalán remarca a necesidade de tomar "medidas cautelares a fin de evitar posibles prexuízos ás entidades implicadas" e insiste en que a investigación do caso debería levar a cabo coa maior rapidez posible.
