Desde que efectuou aquelas polémicas declaracións xusto ao terminar a final da Champions League, a incógnita sobre o futuro de Cristiano Ronaldo segue sen despexarse. O portugués desatou a tormenta ao dicir que "fora moi bonito xogar no Real Madrid", aínda que despois matizouno cun conciso "vémonos o ano que vén".
E agora, pasados xa varios días, e sen haber confirmación oficial por parte de CR7, é o diario luso Record o que afirma taxativamente que "Cristiano sairá do Madrid". Esa é a súa portada deste xoves, na que engade, ademais, que o futbolista xa tomou unha decisión e que esta é "irreversible".
Entre os motivos que apunta Record non só figuran os económicos –Florentino Pérez prometeulle un aumento de soldo para equiparalo con Messi e Neymar pero non o cumpriu– senón que tamén influiría o pouco agarimo que, ao seu xuízo, lle amosa o presidente branco.
Non é a primeira vez que a prensa portuguesa dá por feita a saída de Cristiano Ronaldo do Real Madrid, aínda que en anteriores ocasións esta non se produciu.
